أنا أغلى من كده
بقلم السفيرة د. نجلاء خطاب 🇪🇬
في علاقات معينة الرد مش بيكون بالكلام
الرد بيكون بالمسافة.
لما تحس إنك مش متقدر
مش لازم تشرح، ولا تبرر
ولا حتى تزعل بصوت عالي وتلوم.
كل اللي محتاج تعمله إنك "تبعد في صمت"
الصمت مش ضعف.. والمسافة مش هروب
دي وسيلة راقية جدًا تقول بيها
*"أنا أغلى من كده"*
الطرف التاني دايمًا واخدك
مضمون كأنك حاجة مفروغ منها
موجود وقت ما يحتاجك، ومتشال على الرف وقت ما يزهق
ساعتها بتبقى المسافة أنسب رد
بتحط كل حد في مكانه
من غير إهانة، ومن غير ما تبقى غلطان.
*الغياب ساعات بيكون أبلغ من العتاب*
لأن في ناس لو اتكلمت معاها مش هتفهم
ولو لومتها هتقلب الترابيزة عليك
فـ بتختار تسكت.. وتبعد.. وتسيب أفعالك هي اللي تتكلم.
ولما تمشي في سكتك وتبعد
اللي مكانش شايف قيمتك، يبدأ يشوفك
بس من بعيد، بعد فوات الأوان.
اللي استرخصك وهو بيشوفك كل يوم
هيموت يعرف أخبارك لما تبقى بعيد
هيدور عليك في كل الأماكن اللي كنت موجود فيها ومش هيلاقيك
ولما يسأل عنك وميلقكش
هيفهم إن احترامك لنفسك مش قابل للتفاوض
وإنك عمرك ما كنت موجود عشان تتحط عليك.
*الكرامة مش بتتشحت.. واللي بيحبك مش هيخليك تختار بينه وبين نفسك.*
وخليك فاكر:
*الناس اللي بتتعود على وجودك مش بتخاف تخسرك*
*بس أول ما تبعد.. بتترعب من فكرة إنك ممكن متبقاش.*
فـ متخليش حد يعلمك قيمتك بعد فوات الأوان
علّمه بإيدك، بالهدوء، وبالمسافة الصح.
مش كل اللي بيمشي بيكون خسران
أوقات اللي بيمشي هو أكتر حد
كسب راحته، وكرامته، وسلامه النفسي
0 تعليقات