أهم الأخبار الساخنة حول العالم
العاركة الكبيرة في الكوكب قربت...
كوريا الشمالية...
العم كيم في كوريا الشمالية نونوت في دماغة يعلن الحرب بعد ما طيارة مسيرة من كوريا الجنوبية عدت الحدود ووصلت لحد العاصمة بتاعته بيونج يانج
والراجل راح مدمر كل الطرق والسكك الحديدية بينه وبين كوريا الجنوبية...
طب العم كيم يسكت على كدا..... أبدا !!
وراح عامل تعبئة عامة في الجيش وتطوع مليون ونص كوري شمالي في الجيش للدخول في الحرب المقدسة
الموضوع يسكت على كدا .... ابدا !!
كبرت في دماغة بقا.... وراح مطلع امر بإطلاق النار فورا لقوات حرس الحدود اللي بينه وبين كوريا الجنوبية
والدنيا هناك تيكلام تيكيلام خالص....!!!
الصين....
الصين الإسبوع ده بتعمل اكبر مناورات في تاريخها في بحر الصين و حوالين جزيرة تايوان....!!
هتقولولي طب ما الصين بقالها اربع سنين بتعمل مناورات لما إتعمينا منها وفعل مفيش....!!
هقولكم بقا الإسبوع ده غير خالص...!!
علشان خفر السواحل الصيني سيطروا على مجموعة جزر تابعة لتايوان وعلى الحد الفاصل بينها وبين تايوان منهم جزيرة سوميدي..... مش كدا وبس!!!
دا كمان خفر السواحل الصيني بعت إشارة للحكومة التايوانية في تايوان وقالهم.... إجهزوا للحرب
ايوا يعني يعملوا ايه مثلا.... هيلبسوا لبس العيد حضرتك !!
ما هما جاهزين للحرب طبعا من زمان
روسيا....
في روسيا بقا في معجنة سيادتك
الجيش الروسي أعلن القضاء على نص القوات الاوكرانية اللي عدت الحدود بينهم وبين اوكرانيا في منطقة كورسك
مش كدا وبس....!!
دا كمان الجيش الروسي بقا على مشارف مدينة خاركييف اللي هي تاني أكبر مدينة أوكرانية واللي لو سقطت خاركييف بعدها على طول كييڤ العاصمة
لدرجة ان زلينسكي طلع وقال وضعنا صعب جدااا لو حلف النيتو متدخلش لإنقاذ أوكرانيا
يا عم زلينسكي هو مش بوتين قالك اللي يلعب الدح ميقولش ممم ؟
المصيبة ان الحكومة الاوكرانية أعلنت إجلاء فوري لكل سكان مدينة خاركييف علشان الجيش الروسي هيجتاحها !!!
الجزائر...
الجزائر كانت مقدمة طلب من السنة اللي فاتت للانضمام لمجموعة البريكس وإترفض السنة اللي فاتت !!
السنادي برضوا الجزائر قدمت طلب تاني وكمان دفعت لبنك البريكس مليار ونص دولار وإترفضت عضويتها في مجموعة البريكس بس إتقبلت في بنك البريكس
مجموعة البريكس طلعت بيان وقالت فيه إن سبب رفض الجزائر علشان إقتصادها مش متنوع وقايم على البترول والغاز فقط
وبسبب إن ملهاش مواقف سياسية حقيقية على الساحة الدولية.... تقصد يعني مواقفها مايعة !!
هتطلعلي واحدة من المطبخ وهي حاطة إيديها في وسطها وتقولي....
بقا الكنانييت إقتصاد الجزاير بعافيتين وإقتصاد إثيوبيا هو اللي إسم الله عليه ورغم كدا دخلوها البريكس ؟؟
شوفي يامدام هقولك على خلاصة الخلاصة في قصة الجزاير !!
الموضوع لا هو إقتصاد ولا حاجة...!!
كل الموضوع إن مجموعة البريكس ليها مواقف دولية موحدة ضد النظام العالمي القديم لتركيعة
من ضمن المواقف دي...!!
هو قطع الغاز تماما عن اوروبا بسبب حرب روسيا واوكرانيا
قامت الجزائر مزودة فرنسا وألمانيا بالغاز
علشان كدا اوروبا ف اول الحرب الروسية كانت بتصوصو من قطع الغاز الروسي انما دلوقتي يادوب قدرت تسند نفسها بالغاز الجزائري ودا اللي مخلي اوروبا لحد دلوقتي مكملة في دعم اوكرانيا
ع الناحية التانية....
أوروبا كانت عنيها من الاول على حقل ظهر المصري اللي هو اكبر إحتياطي غاز في العالم إنه يعوضها عن عجز الغاز اللي عندها بسبب حرب روسيا
بس للاسف حقل ظهر حصل فيه خورم.... لاتخرج قبل ان تقول سبحان الله
ومصر بقت تشتري غاز من هولندا بأغلى سعر في العالم علشان الكهربا اللي بتقطع عندنا اللي هو اصلا عندنا إكتفاء ذاتي من الغاز حضرتك من ٢٠١٨..... ياااخي والله اللي بيلعب الشطرنج ده إبن لعيبة وعالمي ... ؟؟
وإزاي رقص اوروبا ترقيصة من ترقيصات محمد صلاح في الملعب وجاب الجون ده
واقنع اوروبا كلها إن معندناش غاز.... وهدومنا متقطعه ومعندناش كهربا والامارات إتبرعتلنا بشحنات غاز يا عيني
دا إحنا حالنا كان يصعب ع الكافر يا شيخة
إثيوبيا....
إثيوبيا بتحتفل بتنفيذ إتفاقية عنتيبي.... !!
لاء ثانية واحدة يابني وطي الدي جي علشان اسمعك !!
إثيوبيا مين !!!
اللي أي خمسة ستة قاعدين ع القهوة عندهم بياخدوا عربية نص نقل ويطلعوا يسيطروا على اديس ابابا العاصمة
دا لسه قوات فانوا مسيطرة على كل المناطق اللي حوالين العاصمة وبينهم وبين اديس ابابا ٣٨ كيلومتر
والحكومة الإثيوبية بالوزاراء ب آبي احمد نفسة غيروا مقرهم لمكان محدش عارفة لحد دلوقتي
وانت جاي تقولي عنتيبي....ياااخي حرام عليك !!!
عنتيبي دي علشان تتنفذ لازم ال ١١ دولة في حوض النيل يوافقوا عليها بالإجماع وتتبعت تتسجل في الامم المتحدة حضرتك
ولحد دلوقتي موقعش عليها غير ٦ دول بس والباقيين معترضين تماما
هتقولولي طب لما إثيوبيا ضعيفة اوي كدا زي ما بتقولي ..... ليه مصر متخلصش عليها ونخلص !!
هقولكم علشان مصر مبتحاربش إثيوبيا حضرتك !!!
لو على إثيوبيا كنا بعتنا عربيتين نقل فيهم شوية صعايدة كانوا نيموهم على بطنهم من المغرب
إنما مصر بتحارب اللي بيشغلوا إثيوبيا !!
هو انت فاكر مصر جايبة الغواصات دي كلها والرافال وحاملات الطائرات علشان إثيوبيا !!
يابني إثيوبيا اتفه من كدا والله
دا السيسي راح إريتريا .... كانوا هيعيطوا والله ومناموش طول الليل
المتخرتأين ولاد راشيل...
بيعلنوا القضاء على الســــــ-نوار
والله !!!
طب زي الفل يعني خلاص كدا إتبطيتوا !!
قالك لاء دا إحنا لسه هنبتدي حضرتك
واللي فات كان حمادة واللي جاي حمادة تاني خالص
يعني إيه بقي ....!!
يابني مش محتاجة فقاقة
النتن مش هو اللي بيحارب ولا ف إيده قرار الحرب
النتن بينفذ مخطط .... لو نفذه هيبقا بطل تاريخي
طب لو انهزم ..... هيتحاكم وهيحاسب على كل المشاريب ويبقا عيل وغلط
اللي حصل ف ٧ اكتوبر كان ضربة إستباقية لتعطيل المخطط اللي مرسوم للمنطقة كلها حضرتك
وفي تحيا مصر
النهاردة الصبح..... زيادة اسعار المحروقات
والبنزين زاد جنيه ونص
وطبعا انا متدايق زيي زيكم..... يعني هي ناقصة
بس لازم تاخدوا بالكم من تفصيلة صغنونة...!!
يارب تيجي على قد كدا....!!
هتقولي ليه !!
هقولكم لو ف الأيام اللي جاية إيــــر-ان إنضربت هينضرب كل مصافي وآبار البترول
واللي برضوا لازم تعرفة إن إيـــ-ران تاني إحتياطي للبترول في العالم
يعني بالصلاة ع النبي كدا ال جنيه ونص اللي حضرتك زعلان منهم ممكن ميبقاش جنيه ونص بس دا ممكن يوصل ل خمسين جنيه..... آه والله
برضوا مش دي المصيبة....!!!
المصيبة إن لو إيـــــر-ان نونوت في دماغها وحبت ترد هتضرب كل قواعد امريكا في المنطقة ومعاها كل آبار البترول اللي في الخليج
هي هددت بكدا...... هتضربوا البترول عندي هضرب البترول بتاعكم اللي في الخليج
ساعتها بقي .... مش هتلاقي اصلا بنزين
دا بالنسبة للواقع العالمي....
طب وبالنسبة للواقع المحلي !!!
والله حضرتك إحنا اللي عملنا في نفسنا كدا
ف اول السنة....!!
نص الشعب المصري كان بيتاجر في الدولار وهو السبب في غلاء الاسعار
حتى الغلابة اللي إنتوا مسمينهم غلابة
من اول البواب للسواق لتاجر الدهب لعامل البنزينة للدكتور للمهندس لصاحب المصنع للشحات اللي بيشحت للحلاق حتى السايس في الشارع..... كله كان بيتاجر وبيخزن دولار
اه والله في سايس قدام القصر العيني بيتاحر في الدولار ومسميه كيوي.... علشان الكيوي لونه اخضر ...
ف الشعب المصري كله ما شاء الله كان في لحظة من اللحظات بيتاحر في الدولار وكله مخزن
حتى المصريين في الخارج
فمتجيش تكلمني ف الجنية ونص .... علشان مش هتعاطف معاك الصراحة بعد اللي إنتوا عملتوه ف مصر
ورغم كدا ورغم كل ده....!!!
انا بقا فرحان جدا للقرار التاريخي..
الحكومة قررت رفع كل المعاشات ألف جنيه
علشان هما دول اللي يستحقوا بجد الدعم
الناس اللي ع المعاش في مصر يا سيسي هما أكتر ناس محتاجة الدعم بجد ..... هما دول الغلابة اللي محدش سامع صوتهم
انا بس ليا أمنية ف الحياة والله ونفسي تتحقق....!!
إن رفع سعر البنزين ده يكون سبب ف ان المكن الصيني اللي الشباب طول النهار بيلفوا بيه في الشارع يتلموا شوية
وان رفع سعر البنزين ده يخلي الأفراح وجيش العربيات والمكن الصيني اللي في الزفة يختفي
ياعم إفرح زي ما انت عايز بس بلاش والنبي تقفل الشارع بالموتوسيكلات
نفسي بقا الحكومة تطلع قرار....!!!
اي فرح او اي زفة في الشارع يمشي وراها عربيات وموتوسيكلات تفرض على كل موتوسيكل ٢٠٠ جنيه.....
يا إما توقف الجوازة والعريس هو اللي يدفع..... علشان يعرف غلطته يمكن يرتجع
ربنا يحمي مصر من كل مكروه..... إحنا داخلين على مفرمة اللي هيعدي من ٢٠٣٠ هو اللي هيكمل
كمان في تحيا مصر
محمد بن سلمان كان في زيارة لمصر...
وعلامة السيسي بقبضة إيده دي معناها إننا إيد واحدة وإن كل اللي كان مطلوب من الزيارة حصل او هيحصل او تم زي ما هو عايز
خد بالك ....
خطورة الزيارة دي جت بعد زيارة عباس عرقجي وزير خارجية إيـــ-ران للسعودية
وقبل زيارة عراقجي للقاهرة....!!
اللي هيزورها النهاردة
لو مفهمتش اللي بين السطور ... يبقا تستاهل الجنيه ونص زيادة في البنزين
التنسيق بين السعودية والإمارات ومصر مش رفاهية لأي دولة فيهم
دي مسألة وجود وحياة او موت حضرتك
كمان في تحيا مصر
مصر هتنفذ طريق دولي ف اوغندا بتكلفة ٧٠ مليون دولار عن طريق شركة المقاولون العرب
دا مش كدا وبس...!!!
إنت نفذت عندهم شبكة طرق طولها ١٦٠ كيلومتر
لدرجة ان الشعب الاوغندي مش مصدق نفسة من جودة الطرق هناك عندهم
طب كل ده بيحصل ليه....!!!
علشان إنت أثبت للعالم بشبكة الطرق العالمية اللي عملتها عندك إنك كبير وشركاتك كبيرة CV إنت قدمته للعالم ولأفريقيا
وخبرة في الطرق
بعد اوغندا نيجريا.... وتشاد .... وليبيا... وإفتح القوس حضرتك
كل دول إفريقيا دلوقتي عايزة الشركات المصرية تنفذ عندهم شبكات طرق
بس الطريق الأعظم واللي هيقلب الدنيا....!!!
واللي لسة القوات المسلحة شغالة عليه وعلى مخططاته هو طريق الإسكندرية كيب تاون
طريق من اول إسكندرية هيوصلك لجنوب إفريقيا ...
كمان في تحيا مصر
مصنع محركات السيارات الهندي في مصر
هندوجا....!!!
دا بقا اللي هنحكية ف التقرير القادم إن شاء الله
تحياااااامصر السيسي حرة شااااامخة عفية.
0 تعليقات