هناك أشياء تُعطى ولا تُطلب بقلم السفيرة د. نجلاء خطاب

 

هناك أشياء تُعطى ولا تُطلب

بقلم السفيرة د. نجلاء خطاب 

هناك أشياء تُعطى ولا تُطلب..  

عفوية الحديث، اهتمام الأحبّة، ووفاء الأصدقاء.

العفوية اللي بتخليك تقول اللي في قلبك من غير فلتر  

من غير ما تحسب الكلمة ألف مرة قبل ما تطلع  

دي مش أي حد يعرف يديهالك. 

دي أمان.. واللي يديك الأمان ده امسك فيه بإيدك وسنانك.

والاهتمام اللي مش محتاج إنك تقول "أنا محتاجك"  

اللي يصحى يلاقيك متغير فيسأل، يتوه فيحس، تقع فيجري  

ده مش حب عادي.. ده حب اتعود يخاف عليك حتى من نفسك.

والوفاء؟  

وفاء اللي واقف في ضهرك وقت ما الكل لف وشّه  

اللي يخسر عشانك، ويسكت عنك، ويدافع عنك وانت مش موجود  

ده مش صديق.. ده وطن.

بس خلي بالك..  

أول ما تبدأ تطلب الحاجات دي بتخسر قيمتها.  

اللي بتطلبه بيبقى شفقة. 

واللي بتتشحته بيبقى دين في رقبتك.

والأصعب؟  

إنك ممكن تفضل عمرك كله مستني الحاجات دي من ناس غلط.  

تدي وتدي وتدي.. وتستنى المقابل  

فتكتشف متأخر إنك كنت بتشحت من اللي المفروض يكونوا سندك.

فـ متستناش حد يحبك بالقطّارة.  

ومتفضلش تبرر وتشرح عشان تاخد اهتمام.  

اللي شايفك يستاهل.. هيدهالك من غير ما تمد إيدك.

*احفظوا أسماء الناس اللي بيدوكم ده كله من سكات*  

*لأنهم قليلين.. ولأنهم لما بيروحوا، مابيرجعوش.*  

ولما بيخلصوا.. بتفهم إنك كنت عايش بنعمة وضيعتها بإيدك